آذربایجان

آیشو (آذربایجان یازیچیلار، شاعیرلر اوجاغی)

 

 

 

 

 

 

ایکی روباعی

 

بوز پارچاسی دیر، داشدی اورکلر قارداش

 

قارداش اوریین توتور کلکلر قارداش

 

هر آن الیمیز خمیرلیدی قارنیمیز آج

 

تندیرده یانیر بیزیم چؤرکلر قارداش

 

 

 

هر سؤز یاراشیر آتیلمامیش بیر اوریه

 

هر یوک سوواشیر چاتیلمامیش بیر کوریه

 

مندن آرالی گزین قومار اوینامیشام

 

من منلیییمی اوتوزموشام بیر چؤریه

 

 

قرنفیل اوچ گول آچار:بهرام سورگون-آرزو مختاری- یالچین سهند

 

سئوگی آزادلیقدیر: سهراب طاهیر

طبیعتین کؤنول آچان

مین رنگی، مین سسی وار

هر اؤرهگین مین آرزوسی

مین سسلی نغمه سی وار

بو آرزولار بو نغمه لر

بو سسلر بیر ساز کیمی

منیم سولغون سوزلریمده

هئچ دیل آچا بیلدیمی؟

حسّیم درین، سؤزوم سولغون

قلبیم گئنیش ، سینه م دار

منده ن اول دوغولوب، سینه مده کی دویغولار

سهو آتیلان آددیملاری

سونرادان آنلاییرام

باخیب وجدان گوزگوسونه

اؤزومو دانلاییرام

ساچلاریما دن دوشور، دن دوشور،یامان دوشور

هر باخاندا آنامین اوره گینه قان دوشور

بو آغ ساچلار، ای آنا، سنی درده سالماسین

ساچیمین آغلیقیندان قانین هئچ قارالماسین

آلیشیرام گئجه لر استول آرخاسیندا من

ساچلاریمدا آغاریر قلبیمین آتشیندان

سن دئمه کی بالامین، بلکه گیزلی غمی وار

واختسیز آغاران ساچین اؤزگه بیر عالمی وار

اؤلوم بئله غم دئییل، بو حیاتی دویانا

من بو آغ ساچلاریما، اؤیونورم ، آی آنا!

قارا، شوه ساچلاری، طبیعت وئرمیش منه

من گووه نه بیلمه رم اونون بو تحفه سینه

زحمتی، حیاتیمین ایلک بزه یی سانمیشام

آغ ساچلاری حیاتدا من اؤزوم قازانمیشام

 

دئییرسن سئومیرم، بس بو عشقه هوس نه دیر

 

قلبیمده یوکسه لن، اودلو نفس نه دیر آی نه دیر

 

اودلو نفس نه دیر

 

اونوتما ایلغاری---- عومروم اولوب یاری

 

اونوتما ایلغاری

 

هر زامان سنی آنارام، عشقینله یانارام- یانارام

 

عشقینله یانارام

 

سئودین منی- منی منده سئودیم سنی

 

سئوه بیلمه م اؤزگه سینی، بونا سبب نه دیر آی نه دیر

 

بونا سبب نه دیر

 

گؤزللر ایچره سن ائی ماهپاره بیردنه سن

 

گؤزللرین گؤزوسن، زولفو قاره بیردنه سن

 

گول اوزلو نازلی صنملر دوشر قدم لرینه

 

بو چشم - مست ایله قیلسان ایشاره بیردنه سن

 

سن اولماسان منی هیجران غمی هلاک ائیلر

 

شیکسته کؤنلومه عالمده چاره بیردنه سن

 

زامانه اهلینه مشهورسان گؤزللیکده

 

بو سیّر گیزلی دئییل، آشکارا بیردنه سن

 

گؤزل حیاتینی واحید فنایه صرف ائتمه

 

سنی زامانه یئتیرمز، دوباره بیردنه سن 

 

 

داغلار باشی دومان اولار

 

یار حسرتی یامان اولار، آغیردیر هیجران

 

یورولدوم گؤزله مکدن

 

سوروشدوم گول چیچکدن، سنی ائی جانان

 

باهار اتدو خزان الدو، بولبول کؤچدو باغلار سولدو

 

نغمه سوسدو، دیل یورولدو، اینتیظارام گل

 

کؤنول یئنه سی آنار

 

محبتینله اودلانار،

 

هیجوم چکر غم لشکری

 

رحمه گل ائی نازلی پری، اینتظارام گل

 

 

 

 

شاه داغیم، چال پاپاغیم، ائل دایاغیم، شانلی سهند´یم

باشی توفانلی سهند´یم

باشدا حئیدر بابا تک قارلا، قیروولا قاریشیبسان

سون ایپک تئللی بولودلارلا اوفوقده ساریشیبسان

ساواشارکن باریشیبسان

گؤیدن ایلهام آلالی سیرری سماواتا دییه رسه ن

هله آغ کورکو بورون، یازدا یاشیل دون دا گییه رسه ن

قورادان حالوا یییه رسه ن

دؤشلرینده سونالار سينه سي تک شوخ ممه لرده

نه سرین چئشمه لرین وار

او یاشیل تئللری، یئل هؤرمه ده آینالی سحه رده

عیشوه لی ائشمه لرین وار

قوی یاغیش یاغسا دا یاغسین

سئل اولوب آخسا دا آخسین

یانلاریندا دره لر وار

قوی قلم قاشلارین اوچسون فره لرله، هامی باخسین

باشلاریندا هئره لر وار

سیلدیریملار، سره لر وار

او اتکلرده نه قیزلار یاناغی لاله لرین وار

قوزولار اوتلایاراق نئیده نه خوش ناله لرین وار

آی کیمی هاله لرین وار

گول- چیچکدن بزه نه نده، نه گلینلر کیمی نازین

یئل اسه نده او سولاردا نه درین راز-و نیازین

اوینایار گوللو قوتازین

تیتره ییر ساز تئلی تک شاخه لرین چایدا چمنده

یئل او تئللرده گزه نده، نه کوراوغلو چالی سازین

اؤرده یین خلوت ائدیب گؤلده پریلرله چیمه نده

قول-قاناددان اونا آغ هووله آچار غمزه لی قازین

قیش گئده ر، قوی گله یازین

هله نووروز گولو وار، قار چیچه یین وار، گله جکلر

اوزلرین تئز سیله جکلر

قیشدا کهلیک هوسیله، چؤله قاچدیقدا جاوانلار

قاردا قاققیلدایاراق نازلی قلمقاشلارین اولسون

یاز، او دؤشلرده ناهار منده سین آچدیقدا چوبانلار

بوللو سودلو سورولر، دادلی قاووتماشلارین اولسون

آد آلیر سندن او شاعیر کی سن اوندان آد آلارسان

اونا هر داد وئره سه ن، یوز او موقابیل داد آلارسان

تاریدان هر زاد آلارسان

آداق اولدوقدا، سن اونلا داها آرتیق اوجالارسان

باش اوجالدیقدا دماوند داغیندان باج آلارسان

شئر الیندن تاج آلارسان

او دا شئعرین، ادبین شاه داغیدیر، شانلی سهند´یم

او دا سن تک آتار اولدوزلارا شئعریله کمندی

او دا سیمورغدان آلماقدادی فندی

شئعر یازاندا قلمیندن باخاسان دورر سپه له ندی

سانکی اولدوزلار اله ندی

سؤز دییه نده گؤره سه ن قاتدی گولو، پوسته نی، قندی

یاشاسین شاعیر افندی

او نه شاعیر، کی داغین وصفینه میصداق اونو گؤردوم

من سنین تک اوجالیق مشقینه مششاق اونو گؤردوم

عئشقه، عئشق اهلینه موشتاق اونو گؤردوم

او نه شاعیر، کی خیال مرکبینه شووشیغایاندا

او نهنگ آت، آیاغین توزلو بولودلاردا قویاندا

لوله له نمکده دی یئر-گؤی، نئجه تومار سارییاندا

گؤره جکسه ن او زاماندا

نه زامان وارسا، مکان وارسا کسیب بیچدی بیر آندا

گئچه جکلر، گله جکلر نه بویاندا، نه او یاندا

نه بليلم قالدي هاياندا؟

باخ نه حٶرمت وار اونون اؤز دئمیشی توک پاپاغیندا

شهريیار´ین تاجي اه یيلمیش باشی دورموش قاباغیندا

باشینا ساوریلان اینجی، چاریق اولموش آیاغیندا

وحیدیر شئعری، ملکلردی پیچیلدار قولاغیندا

آیه لردیر دوداغیندا

شهدي وار بال دوداغيندا

او دا داغلار کیمی شانینده نه یازسام یاراشاندیر

او دا ظالیم قوپاران قارلا، کولکله دوروشاندیر

قودوزا، ظالیمه قارشی سینه گرمیش، ووروشاندیر

قودوزون کورکونه، ظالیم بیره لر تک داراشاندیر

آمما واختیندا فقیر خالقی اه ییلمیش سوروشاندیر

قارا میللتده هونر بولسا، هونرله آراشاندیر

قارالارلا قاریشاندیر

ساریشاندیر

گئجه حاققین گؤزودور، طور تؤره تمیش اوجاغیندا

اریییب باغ تک اوره کلردی یانارلار چیراغیندا

مئی، محببتدن ایچیب لاله بیتیبدیر یاناغیندا

او بیر اوغلان کی، پریلر سو ایچه رلر چاناغیندا

اینجی قاینار بولاغیندا

طبعی بیر سئوگیلی بولبول کی، اوخور گول بوداغیندا

ساری سونبول قوجاغیندا

سولار افسانه دی سؤیله ر اونون افسونلو باغیندا

سحه رین چنلی چاغیندا

شاعیرین ذٶوقو، نه افسونلو، نه افسانه لی باغلار

آی نه باغلار کی "الیف لئیلی" ده افسانه ده باغلار

اود یاخیب، داغلاری داغلار

گول گوله رسه بولاق آغلار

شاعیرین عالمی اؤلمه ز، اونا عالمده زاوال یوخ

آرزولار اوردا نه، نه خاطیرله یه ایمکاندی، ماحال یوخ

باغ-ي جننت کیمی اوردا "او حارامدیر، بو حالال" یوخ

او محببتده ملال یوخ

اوردا حالدیر، داها قال یوخ

گئجه لر اوردا گوموشدندی، قیزیلدان نه گونوزلر

نه زوموررود کیمی داغلاردی، نه مرمر کیمی دوزلر

نه ساری تئللی اینه کلر، نه آلا گؤزلو اؤکوزلر

آی نئجه آی کیمی اوزلر

گول آغاجلاری نه طاووس کیمی چترین آچیب الوان

حولله کروانیدی، چؤللر، بزه نه ر سورسه بو کروان

دوه کروانی دا داغلار، یوکو اطلسدی بو حئیوان

صابیر´ین شهرینه دوغرو، قاتاری چکمه ده سروان

او خیالیمداکی شیروان

اوردا قار دا یاغار، آمما داها گوللر سولابیلمه ز

بو طبیعت، او طراوتده ماحالدیر، اولابیلمه ز

عؤمر پئیمانه سی اوردا دولابیلمه ز

او اوفوقلرده باخارسان نه دنیزلر، نه بوغازلار

نه پری لر کیمی قولار، قونوب-اوچماقدا نه قازلار

گؤلده چیممه کده نه قیزلار

بالیق اولدوز کیمی گؤللرده، دنیزلرده پاریلدار

آبشار مورواریسین سئل کیمی تؤکدوکده خاریلدار

یئل کوشولدار، سو شاریلدار

قصریلر واردی قیزیلدان، قالالار واردی عقیقدن

رافائل تابلوسو تک، صحنه لری عهد-ي عتیقدن

دویماسان کؤهنه رفیقدن

جننتین باغلاری تک باغلارینین حورو قوصورو

الده حوریلرینین جام-ی بولورو

تونگونون گول کیمی صهبا-يی طهورو

نه ماراقلار کی، آییق گؤزلره رؤیادی دئییرسه ن

نه شافاقلار کی، دیرن باخمادا دریادی دئییرسه ن

اویدوران جننت-ي مأوادی دئییرسه ن

زٶهره نین قصری بیریلیان، حيصار نرده سی یاقوت

قصر-ی جادودو، موهندیسلری هاروت ایله ماروت

اوردا مانی دایانیب قالمیش او صورتلره مبهوت

قاپی قوللوقچوسو هاروت

اوردا شئعرین، موزیکین منبعی سرچئشمه دی قاینار

نه پریلر کیمی فه وواره دن افشان اولوب اوینار

شاعیر آنجاق اونو آنلار

دولو مهتاب کیمی ایستخریدی فه وواره لر ایله

ملکه اوردا چیمیر، آی کیمی مهپاره لر ایله

گوللو گوشواره لر ایله

شئعر-و موسیقی شاباش اولمادا، افشاندی پریشان

سانکی آغ شاهیدیر اولماقدا گلین باشینا افشان

نه گلینلر کی، نه انلیک اوزه سورته رلر، نه کیرشان

یاخا نه تولکو نه دووشان

آغ پریلر، ساری کؤینه کلی بولودلاردان ائنیرلر

سود گؤلونده ملکه ایله چیمه رکن سئوینیرلر

سئوینیرلر، اؤیونورلر

قووزاناندا هله الده دولو بیر جام آپاریرلار

سانکی چنگیلره، شاعیرلره ایلهام آپاریرلار

دریا قیزلارینا پئیغام آپاریرلار

دنیزین اؤرتویو ماوی، اوفوقون سقفی سماوی

آینادیر هر نه باخیرسان: یئر اولوب گؤیله موساوی

غرق اونون شئعرینه راوی

غورفه لر، آی، بولود آلتیندا اولار تک گؤرونورلر

گؤز آچیب-یومما، چیراقلار کیمی یاندیقدا سؤنورلر

صحنه لر چرخ-ی فلک تک بورونوب، گاه دا چؤنورلر

کؤلگه لیکلر سورونورلر

زوهره ائیواندا ايلاهه شینئلینده گؤرونه رکن

باخسان حافيظ´ی ده اوردا صلابتله گؤره رسه ن

نه سئوه رسه ن

گاه گؤره ن حافظ-ي شیراز ایله بالکاندا دوروبلار

گاه گؤره ن اورتادا شطرنج قورارکن اوتوروبلار

گاه گؤره ن سازیله، آوازیله ائیله نجه قوروبلار

سانکی ساغر ده ووروبلار

خاجه الحان اوخویاندا، هامی ایشدن دایانیرلار

او نوالرله پریلر گاه اویوب گاه اویانیرلار

لاله لر شٶعله سی، الوان شیشه رنگی بویانیرلار

نه خومار گؤزلو یانیرلار

قاناد ایسته ر بو اوفوق، قوی قالا ترلانلی سهند´یم

ائشیت اؤز قیصصه می، دستانیمی، دستانلی سهند´یم

سنی حئیدر بابا او نعره لر ایله چاغیراندا

او سفیل داردا قالان تولکو قووان شئر باغیراندا

شئیطانین شیللاغا قالخان قاتیری نوخدا قیراندا

بابا قورقور (؟) سسین آلدیم، دئدیم آرخامدی، ایناندیم

آرخا دوردوقدا سهند´یم ساوالان تک هاوالاندیم

سئله قارشی قووالاندیم

جوشقون´ون دا قانی داشدی، منه بیر هایلی سس اولدو

هر سسیز بیر نفس اولدو

باکی داغلاری دا، های وئردی سسه، قیها اوجالدی

او تایین نعره سی سانکی بو تایدان دا باج آلدی

قورد آجالدیقدا قوجالدی

راحیم´ین نعره سی قووزاندی، دییه ن توپلار آتیلدی

سئل گلیب نهره قاتیلدی

روستم´ین توپلاری سسله ندی، دییه ن بوملار آچیلدی

بیزه گول-غونچا ساچیلدی

قورخما گلدیم دییه، سسلرده منه جان دئدی قارداش

منه جان-جان دییه ره ک، دوشمنه قان-قان دئدی قارداش

شهریيار سؤیله مه دن گاه منه سولطان دئدی قارداش

من ده جانیم چیغیریب: جان سنه قوربان دئدی قارداش

یاشا اوغلان سیزه داغ-داش دلی جئیران دئدی قارداش

ائل، سیزه قافلان دئدی قارداش

داغ، سیزه آسلان دئدی قارداش

داغلی حئیدربابا´نین آرخاسی هر یئرده داغ اولدو

داغا داغلار دایاق اولدو

آراز´یم آینا-چیراق قویمادا،آیدین شافاق اولدو

او تایین نغمه سی قووزاندی، اوره کلر قولاق اولدو

یئنه قارداش دییه ره ک قاچمادا باشلار آیاق اولدو

قاچدیق، اوزله شدیک آرازدا، یئنه گؤزلر بولاق اولدو

یئنه غملر قالاق اولدو

یئنه قارداش سایاغی سؤزلریمیز بیر سایاق اولدو

وصل اییین آلمادا، ال چاتمادی عئشقیم داماق اولدو

هله لیک غم سارالارکن قارالار دؤندو آغ اولدو

آراز´ین سو گؤلو داشدی، قایالیقلار دا باغ اولدو

ساری سونبوللره زولف ایچره اوراقلار داراق اولدو

یونجالیقلار یئنه بیلدیرچینه یای-یاز یاتاق اولدو

گؤزده یاشلار چیراق اولدو

لاله بیتدی یاناق اولدو

غونچا گولدو، دوداق اولدو

نه سول اولدو، نه ساغ اولدو

ائلیمی آرخامی گؤردوکده ظالیم اووچو قیسیلدی

سئل کیمی ظولمو باسیلدی، زینه آرخ اولدو، کسیلدی

گول گؤزوندن یاشی سیلدی

تور قوران اووچو آتين قوومادا سیندی، گئری قالدی

اؤزو گئتدی، تورو قالدی

آمما حئیدربابا دا بیلدی کی، بیز تک هامی داغلار

باغلانیب قول-قولا زنجیرده، بولودلار اودور آغلار

نه بیلیم بلکه طبیعت اؤزو نامرده گون آغلار

ایری یوللاری آچارکن، دوز اولان قوللاری باغلار

صاف اولان سینه نی داغلار

داغلارین هر نه قوچو، ترلانی، جئیرانی، مارالی

هامی دوشگون، هامی پوزغون، سینه لر داغلی، یارالی

گول آچان یئرده سارالی

آمما ظن ائتمه کی، داغلار یئنه قالخان اولاجاقدیر

محشر اولماقدادی بونلار داها وولقان اولاجاقدیر

ظولم دونیاسی یانارکن ده تیلیت قان اولاجاقدیر

وای ...! نه توفان اولاجاقدیر

دردیمیز سانما کی، بیر تبریز-و تئهران´دیر عزیزیم

یا کی، بیز تورک´ه جهننم اولان ایران´دير عزیزیم

یوخ بو دین داعواسیدیر، دونیا تیلیت قاندیر عزیزیم

تورک اولا، فارس اولا دوزلوک داها تالاندیر عزیزیم

بیز آتان دیندیر، آتان دا بیزی ایماندیر عزیزیم

سامیری مروتد ائدیب هه نه (؟) موسلماندیر عزیزیم

اوممه تین هارون´و من تک، له له گیریاندی عزیزم

هر طرفدن قیلیج ائندیرسه لر (؟) قالخاندیر عزیزیم

بیر بیزیم درمانیمیز موسی-يي عيمران´دیر عزیزیم

گله جک شوبهه سی یوخ، آیه-يی قورآندیر عزیزیم

او هامی دردلره درماندیر عزیزیم

دوقتور اولدوقدا بشر بو یارانی ساغلاماق اولماز

اولماسا آللاه الی دین مرضین چاغلاماق اولماز

داغلاماق دا علاج اولسا بیر ائلی داغلاماق اولماز

دینی آتمیش ائله یاوروم داها بئل باغلاماق اولماز

او گولوب آغلایا دا، اونلا گولوب آغلاماق اولماز

شئیطانی یاغلاماق اولماز

دئدین: آذر ائلینین بیر یارالی نیسگیلییه م من

نیسگیل اولسام دا گولوم بیر ابدی سئوگیلییه م من

ائل منی آتسا دا اؤز گوللریمین بولبولویه م من

ائلیمین فارسیجا دا دردینی سؤیله ر دیلییه م من

دینه دوغرو نه قارانلیق ایسه ائل مشعلییه م من

ادبیيات گولویه م من

نیسگیل اول چرچییه قالسین کی جواهیر نه دی قانمیر

مدنیيت دبین ائیلیر بدويیت، بیر اوتانمیر

گون گئدیر آز قالا باتسین گئجه سیندن بیر اویانمیر

بیر اؤز احوالینا یانمیر

آتار اینسانلیغی آمما یالان انسابی آتانماز

فیتنه قووزانماسا بیر گون گئجه آسوده یاتانماز

باشی باشلارا قاتانماز

آمما مندن ساری، سن آرخایین اول شانلی سهند´یم

دلی جئیرانلی سهند´یم

من داها عرش-ي اعلا کؤلگه سی تک باشدا تاجیم وار

الده فيرعون´ا قنیم بیر آغاجیم وار

حرجیم یوخ، فرجیم وار

من علی اوغلویام، آزاده لرین مرد-و مورادی

او قارانلیقلارا مشعل

او ایشیقلیقلارا هادی

حاققا، ایمانا مونادی

باشدا سینماز سیپریم، الده کوته لمه ز قیلیجیم وار

 

 

بیلیرسن سنی سئومک انتحار کیمی دیر.!!

باشارمیرام

باشاریرام

باشارمالییام.

فعل لر صرف اولونمور سنی سئونده

اولونور ها 
      

قاریشیر سئومک.

هامینی سئومک اولور    سنی سئونده

سنی سئونده اوءلورم بیردن

انتحار ائدیرم

انتحار ائده جه یم

انتحار ائتدیریرسن.

یونانی سئومیرم
      

       سنی سئویرم 
       

               فرانسانی دا!

سنی سئومه سم جومله قورولوشوم دوزه له جک...

انتحار ائتمیرم

سنی سئویرم اونون یئرینه...

 

 بوراخما اللریمی ساتن کؤینکلیم

اردبیل کوچه ­لرینده ایتَرَم بیردن

یومما گؤزلرینی کتان کؤینکلیم

باخیشینین هاواسی باشیمدا گزیر

سسینی توراغایی­لار اوخویور

قاتارلار تورموز ائدیر

ماشین­لار توی سیغنالی چالیر

سسینی شعیر یازیرام

سسینی سئویشیرم.

باغیشلایین خانیم سسیزی ایتیرمیشم

سیزین موبایلین نومره­ سی زیندانا دوشوب

آدینیز سارایین دؤشلویونون جیبینده گئتدی

چایی توللانا بیلمه­ دی

عشقه ووردو اؤزونو...

آدینیزی خان چوبان بازار آغزیندا

یئر آلما چؤرک ساتیر.

آدینیزی ایستی سیمیشقا چیرتداییرام

آدی       نه ایدی...      سیزین؟؟؟

هه    کلاسیک شعر، فلاش فیکشن

یوخ     آد سیغمیر ادبیاتا

سسیزی یاشاییرام ساده­جه

آخی سئللولوم کیچیکدی بیر آز

سیز سیغیشمیرسیز

یومروغومدا یئرلشن قلبیمه

یومروغوم آچیلسا

بوتون قزئت­لر خبردن داشار

داشماسایدی آرپا چایی

داشما...  داش...

سسینی یاشاییرام اردبیل کیمی

سسینی "سحر"

"سحر- سحر باغا گیردیم"

باغیشلا  خانیم "پیراتملیکدن بالیخلی"­یا نئجه گئدیم من؟

آخی   ساوالانی آشماغیم گلیر

سیزین سسیزی چوخدان گؤرموشم

تئلفونوز زیندانا دوشموشدو مننن

خوشوم گلیردی آدینیزدان

آدی       نه ایدی...     سیزین؟؟؟

تئلفونوز دیلیمین اوجوندان

صیفیردن باشلانیردی

سیزینله "یاشماق"یم گلیر

یاشاماق ...

یاشاماق اولار

بو شهرده پولسوز؟

- کیم دئدی من اؤلموشم؟

هانسی یوسف خیال اوغلو؟

آی ائششگ اوغلو!

- سارایین دالییجا گئتمیشدیم

قورخومدان چایی توللانانما­دیم!..

کیم   لووا وئردی منی؟

من بارالاریمی ییغیشدیرا بیلمیرم خانیم

بوردان قبریستانا نئچه اؤلو سیغیشار؟

یانی دیری­لر نئجه کئف چکیرلر ائهمال-ائهمال

بوردان ساوالانا نئچه ؟...

گؤزلدی ساعاتیز

سوییس­دی کوردوستان؟!.

یانی دئییرم من ساختا قلبدن باش چیخاردیرام

اللریزی وئرین الیمه

لوطفن

منی بیر یئره گؤتورون

خسته­ خانایا

ائوینیز یاخشی­دی البتّه

نومره ­زی آلیب قاییدارام

سسیزی ایتیرمیشم اینشیلدن

بوراخما اللریمی نه اولار

"سسین گلسین ساری بولبول"

منه بیر آدرسجیک سسین گلسین.

- سیزین ائوه هانسی پلاک لازیمدی؟

هانسی خیابان، منی فخری خیابانیندان

سیزه گتیرر ؟

هانسی اوتوبوس؟

اوزوزو چؤندَرین گونشه

بیر - ایکی - اوچ

تولازلانین منیمله دلی­لیگی

سارای توللاندی­ ها... قاداسی...

بس اوندا نومره­ زی وئرین

بیر شاعیر سیزی شعیرلندیریر

- من آزمیشام خانیم ناز

منی ائویزه،

پولیسه

آپارین.

نومره ­سی نه ایدی؟

ائویزین!    قاپیسی!    پولیسین !!.

دانیشین موبایلیم سسیزدن دولسون

بولوتوث ائدین اؤزونوزو لوطفن

باش اوسته یومدوم گؤزلریمی!..

"سسین گلسین باری بولبول"

من عاشیقم وطن یاخشی

گئیمه ­یه  کتن    یاخشی کؤینک    ایسته­میرم

من سیزی گئی....یئمک   ایسته­ ییرم

آجام

اللریزی یئمه ­رم واللاه...

قاشسیز اوزویومون قاشلیسیندان

جیبیمده اولسایدی

بارماغیزا نه یاراشیر اوزوک

یوخدو منده اوز...

یانی دئمه ­لی سیز هارالی­سیز؟

شورابیل سیزه اوخشاییر

سیز یوخ...

آخی تربیه­ سیزدی آتلاری

آغ بالیقلاری آنجاق

یانی سیز آغ بالیق

نئور گؤلو سیزدن

سیز گؤزلسیز دئییرم مطلق

گئرچکدن

اللریمی بوشلاساز، اللریم تؤکولر هاااا

کیم ییغیشدیراجاق بو سویوقدا

بو قدَر سئوگی  بارماقلارینین ایزلرینی.

دئییرم هادیر اولون

من الیزده قالارام

قالسام دا کی "پنجره­ دن داش گلیر"

آی سانسور ائتدیم بیر آزین

"آللاها دا خوش گلیر"

آی منه بیر زنگ ائله...

منی راپور وئرمه گؤزلرینله

داما وئردیر دامسیزام

سند گتیر آدامسیزام

سن کی زیبا کرباسی­ دن ده گؤزلسن

نازپری­دن ده، هم ده...

گؤزوم گؤزونون اویونجاغی­دیر

بوراخما

بوراخما اللریمی نه اولور

اردبیل کوچه­ لرینده ایت قاپار منی

سسله آدیمی سسله

من؟   من؟من گونش اوغلویام       خانیم سن آی   ؟

آدینیز   دیله  -   دیشه     گلمیر

آدی   نه ایدی     سیزین  ؟؟؟

من سیزه گئدیرم

سیز هاچان گلیرسیز   منی   قوناق   ؟!.

من....   من.....   من.....

نه دیلنن دئییم جوجه­ م

آی لاو یو   آی    آی

اُحِِبُ    اُحِِبُ    اُحِِبُ یا حبیبی

قیزا سئوییوروم سِنی

بالالی....

گئتمه...

دایان...

دور...

به ائششه­ یین قیزی

آخی سئویرم سنی...

 

 

یاغیش بیزی ایزله‌ییر سئوگیلیم، یالنیزجا بیز

 

آنی‌لاری‌نی یئرلردن توپلایان‌لار درنگیندن دؤنورم

 

بیر یانیب بیر سؤنورم

 

یاغیش بیزی ایزله‌ییر سئوگیلیم، یالنیزجا بیز

 

یالنیزجا بیز کئچمیشی یاندیردیق، یالنیزجا بیز

 

بیر چتیره چارپیپ باتان بیر گمی‌ده‌ایدیک، اییلدیک

 

اییلدیک و ایپ‌لرینی چؤزدوک

 

سون سؤز ایپلی اوچورتما شنلیگینه دؤنوشدو بیرلیک‌ده‌لیییمیز

 

یاغیش بیزی ایزله‌ییر سئوگیلیم، یالنیزجا بیز

 

آغزیمیز سوروتله‌ییب گؤتورور چالار ساعات‌لاری

 

ان تهلیکه‌لی اوتاق‌لارینداییق هتل‌لرین

 

آنی‌لاری‌نی یئردن توپلایانلار درنگیندن دؤنورم

 

بیر یانیب بیر سؤنورم

 

یاغیش بیزی ایزله‌ییر سئوگیلیم، یالنیزجا بیز

 

یالنیزجا بیز بایراق‌لاری یاندیردیق، یالنیزجا بیز

 

گؤزیاشی شیشه‌لرینه چارپیپ قیریلان بیر اؤلکه‌ده‌ایدیک، سئودیک

 

سئویلدیک و چیرکه پاسا دایاندیق

 

یئنی‌دن سئودالانیرام سنه بیربئله قاچاق گون‌لردن سونرا

 

یاغیش بیزی ایزله‌ییر سئوگیلیم

 

بیر بارداق یئر اوزونده یئنی‌دن فیرتینا

 

 

 

هر چند که رنگ و زیباست مرا

چون لاله رخ و چوسرو بالاست مرا

معلوم نشد که در طربخانه ی خاک

نقاش ازل بهر چه آراست مرا

******

آز یوخدو گؤزللیکده منیم تک گؤزلین

سروین قدری قددیم.اوزوم لاله کیمین

آنجاق بیله بیلمدیم منی توپراقدان

نیچین یارادیب گؤزل یارادان نیچین

******

آنان که ز پیش رفته اند ای ساقی

در خاک غرور خفته اند ای ساقی

رو باده خورو حقیقت از من بشنو

باد است هر آنچه گفته اند ای ساقی

******

بیزدن قاباق اول لار کی گئدیب لر ساقی

توپراقدا یاتیبلار نه ائدیب لر ساقی

گل حق سؤزو مندن ائشید ایچ قانلی شراب

بوش بیر سؤزوموش هر نه دییب لر ساقی

******

ای دل چو حقیقت جهان هست مجاز

چندین چه بری خواری از این رنج دراز

تن را به قضا سپار و با درد بساز

کاین رفته قلم زبهر تو ناید باز

******

دونیانین اگر حقیقتی اولسا یالان

نیچــــین اؤزونو فلاکته درده سالان

محنتله گئچین باش ای یازیلمیش قدره

دؤنمز داها هچ زمان ازلدن یازیلان 

******

در گوش دلم گفت فلک پنهانی

حکمی که قضا بود زمن می دانی

در گردش خود اگر مرا دست بدی

خود را برهاند می زسرگردانی

******

آغزین گتیریب دانیشدی آلچاخجا فلک

تقدیری اگر یاخشی بیلیرسن نه دئمک

وئرمزدیم آیاق دولانماقا بوش یئردن

اولسایدی اگر قضانی تسلیم ائتمک

 

 

ادامه مطلب

 

آسلاییب یئنی دن کونلومودارا

اوره گین صبیرین گتیریب زارا

گیزلین محبتیم چیخیب آشکارا

دردیمی قانانا حسرت چکیرم.

 

بیر سازام سیملری پارالانمیشام

بیتمه میش یارالار یارالانمیشام

یانقی یانقی یاردان آرالانمیشام

یانیندا دورانا حسر چکیرم.

 

گؤزلرین چاخدیریب گؤزومه باخدی

دردیمه اینانیب سؤزومه باخدی

یاندیریب،کؤنلومو،کؤزومه باخدی

یازی سین یازانا حسرت چکیره م

 

دونیادا عاشیقدان دویان دئییلم

غم منی سوسدورا،قویان دئییلم

محبت پالتارین سویان دئییلم

"دنیزم" طوفانا حسرت چکیرم

 

 

 

 

سنی سئومک اولارمی؟

سنین هوسینین محکمه سینده چکیلدی
                        

معصومیتیم دار آغاجینا.

کلفچه لی اللریمله

سنینله دانس ائتمک اولارمی؟

سندن واز کئچمک ده اولماز!

منیم آنا یاسامدا
   

سنی سئومه مک 
    

    یاساقدیر !

 

 

دووشان یوخوسو

یووشان قوخوسو

                و پلنگ مغلوبیتی هاوادا

سن دئمه یازین سون آیی

                  رئفورم آیی دئییلمیش

                یاشیلدا آل قان

                و ساده­ جه­ آی­دا خانیم – آذر بای.. 

                            یانی یاشاسین آذر آیی !

آخی اوغلوم اینانمیر کی سن

               بو فصلین پرزیدئنتی دئییلسن!..

کوچه دووارلاریمیزدا دا گؤیرمیشدی

             «تورک اوغلو رییس جمهوروموز»

            دمکراتلیق شیکسته چالیر...

آنامین سسی اوغورلانیر

                اوغلومون دووشان یوخوسو

و من آوارا گزیرم هانسی کوچه قادینی

             اوغلومون آناسی اولسون.

نای-نای   نینانای    نای-نای...

کوچه­ ده کافتارلار پلنگ اوولاییر

تاخ-تاخ   تیتاتاخ    تاخ-تاخ...

              ***

قویاق کی مملکتی اونوتدورولدو اوپوزوسیونون

ومن دونیاجیغاز دئدییین جیندانی لپ­تاپ چانتاسیندا داشییرام!

                               اون­ بئشینجی اصلی ده ایسته ­مه ­دیک!

به بو کارتون وطن­لر هاردا یوخلایاجاق؟

بو  هاوانین قادا بالاسی دَیسین دیکتاتورا

هاوادا توز تورپاق اولار دا به !

                         قورخما کوچه ­لره ده سو سپیلیر.

بالاسی پلنگ ننه­ لر صبح نامازیندا 31 دؤنه دئییر...

 گون آیدین پرزیدئنت - گون آیدین پرزیدئنت - گون آیدین پرزیدئنت - گون آیدین پرزیدئنت 

گون آیدین پرزیدئنت - گون آیدین پرزیدئنت - گون آیدین پرزیدئنت - گون آیدین پرزیدئنت                       

گون آیدین پرزیدئنت - گون آیدین پرزیدئنت - گون آیدین پرزیدئنت - گون آیدین پرزیدئنت

گون آیدین پرزیدئنت - گون آیدین پرزیدئنت - گون آیدین پرزیدئنت - گون آیدین پرزیدئنت                      

گون آیدین پرزیدئنت - گون آیدین پرزیدئنت - گون آیدین پرزیدئنت - گون آیدین پرزیدئنت

گون آیدین پرزیدئنت - گون آیدین پرزیدئنت - گون آیدین پرزیدئنت - گون آیدین پرزیدئنت                      

گون آیدین پرزیدئنت - گون آیدین پرزیدئنت - گون آیدین پرزیدئنت - گون آیدین پرزیدئنت

گون آیدین پرزیدئنت - گون آیدین پرزیدئنت - گون آیدین پرزیدئنت . . .

                                                                         

                                                                                " سعید موغانلی"

 

 

ائو ،سنسیز اولوبدو دوستاغیم

ایچگیم زهر اولدو،غم چاناغیم

 

آختارمادادیر گؤزوم ده هر آن

بیر یئرده دورانماییر آیاغیم

 

هجران گئجه سی اوزون دور آمّا

جانیم یاغ اولوبدو،گؤز چراغیم

 

عقلیم ده گئدیب باشیمدان آخر

باش تاپماییرام سولوم مو- ساغیم؟

 

قورمازلا قوناغی هرکیم اولسون

نئیلیم کی اولوبدو غم قوناغیم

 

خوشدور اوره گیم کی جان سنیندیر

کیم سندن اوره کده واردی داغیم

 

مجنون ! نه گؤروبسن آیریلیقدان؟

عشق و غم و بیرده اشتیاقیم

 

 

نازنین قورتاردی هجرین جانی تابیم قالماییب

گل ایاغیمدادا بیر داملا شرابیم قالماییب

 

بو سیناق موشکولدو پس وئردیکجه آرتار اضطراب

بو سیناقدان سونرا سانما اضطرابیم قالماییب

 

آلقیش اول اوستاده بو تکلیف عشقی وئرمه دن

باد اسدی دفتریم گئتدی کتابیم قالماییب

 

آتش عشق ایله باد هجر ال بیر اولدولار

کؤزلرین اوستونده جان یاندی کبابیم قالماییب

 

بسدی مجنون دا بسدیر،سؤیله دی شول نازنین:

عاشق دلداده اوزره یوخ جوابیم قالماییب 

 

 

نه دن ائیلیرسن افغان یاره کؤنلوم

تاپیلماز درده درمان یاره کؤنلوم

دیدرگین دوشمه دن داغلاردا بیر گون

اولارسان بیر بورولغان یاره کؤنلوم

 

 

 

 

ای اوره ک مأوا سنه بو سینه ی سوزان اولوب

سندن اؤترو مین کره یاندیقجا اووددا قان اولوب

 

بو نه رسم عهدو ایلقارو فادیرعشق اوچون

تکجه فرمان ائیله ین سن ، ذبح اولان دا جان اولوب

 

عشق هردن سؤیله ییر: گئت ال،ایاغیمدان ساقین

ال،ایاغیمدان توتانلار بیر به بیر قوربان اولوب

 

رنگی سولموش صورتی گؤر دو کجه مجنون گوز گوده

سؤیله دی حقّا کی جانین لایق جانان اولوب 

 

 

سوسماز نه دن کؤنلون سنین

ال چک گؤزل مندن ساقین

باختی قارادیر بنده نین

ال چک گؤزل مندن ساقین

 

کؤنلوم اولوبدور غم،کدر

غملر منی دایم گودر

ایرماق سویو دورماز گئدر

ال چک گؤزل مندن ساقین

 

افسونه سالدی گؤزلرین

بو جانیمی هم سؤزلرین

اولدو یالان اول دوزلرین

ال چک گؤزل مندن ساقین

 

دوشدوم یولا،جان ایزله دیم

جانان سنی چوخ گؤزله دیم

بو سیرریمی قوی گیزله دیم

ال چک گؤزل مندن ساقین

 

 

قراریم گئتدی باخ صبریم تو کندی

یئنه غملر اوره کده تازه لندی

 

اوزون دؤندردی مندن نازنینیم

سالیب اود جانه گؤز یاشیم الندی

 

او جاناندان جفا مین لر وفادیر

بو رسم عاشقلر ایچره آلدی کندی

 

نه دیر جان الده توتدوم یاره خاطر

کی بیلسین مدّعی بو بیر روندی

 

صداقتدن ایراق اولماز بو کؤنلوم

منیم یاریملا پیمانیم همندی

 

چکیبدیر جانی لیلی زولفو داره

آچیلماز بو دویون مؤحکمدی بندی

 

آزیبدیر اؤز یولون آواره مجنون

داها یئرسیز گلیب وئرمزله پندی

 

 

یاندی اوره ک هجرده هئچ خبرین اولمادی

ظالم اونو تدون منی،بیر ثمرین اولمادی

 

هجرینه دؤزدو کجه من عشق اودونا یانمیشام

شیمدی کؤزرلنمیشم سن نظرین اولمادی

 

من سنی ساندیم دنیز،عشق ایله دالدیم سنه

گلدی سیناق آیه سی بیر گؤهرین اولمادی

 

حئیف او زامان قووزادیم اللری دامانیوه

سن سویوق اللرده بیر تیز تبرین اولمادی 

 

مجنونا نقل ائیله مه دردینه درمان نه دیر

عشق هنردیر منه سن هنرین اولمادی

 

"منابع:بیرقوجاق سئوگی کیتابندان"

 

 

هجرین منه غم ساتار سنسیز

باختیم قارالیب یاتار سنسیز

 

شنلیکدن اوره ک اوزاقدی،جانیم

سون مرزینه بیل چاتار سنسیز

 

گوندوز گئجه یه دؤنر،قارانلیق

حؤکم ایله گونش باتار سنسیز

 

"جنّت دی منه جهان سن ایلن"

دونیانی گؤزوم آتار سنسیز

 

قویدون سیناغا بوجانی،مجنون

گؤز یاشینا،قان قاتار سنسیز

 

 

بیر سازیم وار اوره گیمده کؤکلنیب

سیز لاییر ایچیمده،یاردان اؤترو

گؤزل دویغولاردان قیر آت مینمیشم

آشیرام داغلاری،نگاردان اؤترو

 

"عاشیقلی کروانا" آخدی گؤز یاشیم

غم لریم سوزولوب اولدو رومان تک

دردیم سره لنیب یاییلدی آشکار

داغلارین کؤکسونو آلدی دومان تک

 

گؤز سنی گؤره بیلمز بیلیرم

یاسادیر گؤز گونه باخسا قاماشار

دیلگیمدیر سنی گؤرم،گؤرسمده

اوره گیم چیرپینیب،دیلیم ده چاشار

 

آلقیش اولسون سنه اوزاقدان دوران

تئل وئرنده یئله کؤنول آلیرسان

دوداق ترپدنده بیر کلمه سؤزلن

داش تک اوره ک لرده مأوا سالیرسان